តិចនិកក្នុងការណាត់ជួបអតិថិជនប្រកបដោយប្រសិទ្ធភាព

1348

យើងអាចនិយាយបានថា អតិថិជនប្រៀបបានដូចជាជីវិត និងសរសៃឈាមនៃក្រុមហ៊ុននីមួយៗ ព្រោះពួកគាត់ជាប្រភពចំណូលដែលអាចធ្វើអោយក្រុមហ៊ុ​នរបស់យើង អាចឈរជើង និងដំណើរការទៅមុខបាន។ បើសិនជាគ្មានអ្នកទិញទេ ក្រុមហ៊ុនយើងក៏មិនអាចលូតលាស់ទៅមុខបានដែរ ដូច្នេះហើយទើបការណាត់ជួបអតិថិជនត្រូវតែរៀបចំទុកជាមុនអោយបានល្អ។ ការមិនបាន​ប្រុងប្រៀបទុកជាមុនក្នុងការជួបអតិថិជន វាមិនត្រឹមតែបង្ហាញពីលក្ខណៈមិនល្អរបស់អ្នកនោះទេ​ ប៉ុន្តែបូករួមក្រុមហ៊ុនទាំងមូលផងដែរ។ ខាងក្រោមនេះគឺជា វិធីសាស្រ្ត៥ចំណុច ដែលជួយអោយអ្នកត្រៀមខ្លួនបានយ៉ាងល្អនៅពេលទៅជួបអតិថិជន​៖

១. មានឯកសារជាក់ស្តែង និងតួរលេខនៅក្នុងដៃ

ផ្ទាំងឃោសនាពាណិជ្ជកម្ម

អ្នកត្រូវប្រាកដក្នុងចិត្តថា អ្នកមានឯកសារ ដែលចាំបាច់សម្រាប់ការប្រជុំនៅក្នុងដៃទាំងអស់។ឯកសារទាំងនោះ អាស្រ័យលើប្រធានបទដែលទាក់និងការណាត់ជួបរបស់អ្នក តែវាអាចមានដូចជា លទ្ធផលលក់ពីខែមុន គោលដៅសម្រាប់ខែនេះ ការវិភាគប្រចាំត្រីមាស និងផែនការជាក់លាក់ ប្រសិនបើអ្នក នឹងណែនាំគំនិតថ្មីណាមួយ។ ប្រសិនបើអ្នកមានគ្រប់ពត៌មាននៅក្នុងដៃ អ្នកនឹងអាចឆ្លើយរាល់សំណួរទាំងឡាយដែលអតិថិជនមានចម្ងល់ ហើយម្យ៉ាងវិញទៀតអ្នកក៏អាចទាញទំនុកចិត្ត ពីអតិថិជនមកលើគោលដៅរបស់អ្នកដោយជោគជ័យផងដែរ។

២. យល់ពីផលិតផល ឬសេវាកម្មឲ្យបានច្បាស់លាស់

នេះគឺជាចំណុចមួយដែលមិនអាចខ្វះបានតែម្តង។ ការដឹងច្បាស់ពីផលិតផលរបស់អ្នកធ្វើអោយអតិថិជនជឿជាក់លើរូបអ្នក ពីព្រោះរាល់អ្វីដែលពួកគេមានមន្ទិលសង្ស័យ គឺអ្នកអាចបកស្រាយបានទាំងអស់។ ផ្ទុយមកវិញ ប្រសិនបើអ្នកមិនបានស្វែងយល់ពីទំនិញរបស់ខ្លួនអោយច្បាស់ទេ អតិថិជននឹងគ្មានថ្ងៃបើកចិត្តទទួលយកនូវការណែនាំរបស់អ្នកទេ។ ចំពោះការនិយាយវិញ គឺត្រូវតែខ្លីៗ ប៉ុន្តែបង្កប់នូវចំណុចសំខាន់របស់ផលិតផលទាំងអស់។

៣. ត្រូវព្រាងចំណុចដែលត្រូវនិយាយទុកជាមុន

អ្នកត្រូវតែព្រាងទុកជាមុននូវអ្វីដែលអ្នកចង់និយាយទៅកាន់អតិថិជន ហើយក៏ត្រូវធ្វើតាមអ្វីដែលអ្នកបានសរសេរព្រាងទុកនោះ។ សេចក្តីព្រាង ត្រូវបូកបញ្ចូលទាំងអ្វីដែលអ្នកទិញនឹងត្រូវពិភាក្សា ព្រមទាំងប្រធានបទដែលអ្នកចង់ធ្វើបទបង្ហាញទៅកាន់អតិថិជន។​ ការរៀបចំដូច្នេះ វាអាចជួយអោយយើងបកស្រាយបាននូវគ្រប់ចំណុចសំខាន់ៗទាំងអស់នៃការណាត់ជួប ហើយបានរលូន។

៤. ចៀសវាងការនិយាយក្រៅប្រធានបទ

ជាការពិតណាស់ ការនិយាយលេងសើចតិចតួចជាមធ្យោបាយមួយក្នុងការចាប់ផ្តើមការសន្ទនា​ ប៉ុន្តែអ្នកគួរតែធ្វើយ៉ាងណាអោយវាមានកម្រិតតិចបំផុតតាមដែលអាចធ្វើបាន។ ការនិយាយលេងសើចខ្លះក៏អាចជួយសម្រាលនូវប្រធានបទមួយចំនួនដែលមានលក្ខណៈប៉ះពាល់ផ្លូវចិត្តផងដែរ។​ យ៉ាងណាក៏ដោយ អ្នកត្រូវកាត់បន្ថយវា ពីព្រោះការនិយាយក្រៅប្រធានបទច្រើននឹងធ្វើអោយអ្នកបកស្រាយចំណុចសំខាន់ៗនៃគោលបំណងរបស់ការណាត់ជួបនោះ មិនបានគ្រប់ជ្រុងជ្រោយឡើយ។

៥. បង្កើតគោលដៅជាក់លាក់

ចូរសរសេរពីអ្វីដែលអ្នកចង់បានពិតប្រាកដពីការជួបអតិថិជននេះ។​ ការមានគោលដៅច្បាស់លាស់នឹងជួយអោយអ្នករៀបចំវាបានល្អ​ហើយឆ្លើយតបនូវចំណុចសំខាន់ៗទាំងមូលតែម្តង។​ ជាការពិតណាស់ អតិថិជនរបស់អ្នក អាចនឹងមិនមានពេលទំនេរច្រើនដើម្បីមកជួបអ្នកទេ ប៉ុន្តែប្រសិនបើអ្នកមានហេតុផលដ៏ជាក់លាក់និងល្អសម្រាប់ពួកគេ ច្បាស់ណាស់ថាអ្នកទាំងនោះនឹងមក។ គោលដៅនៃការជួបនោះអាចជា តើអតិថិជននឹងទទួលបានអ្វីពីការជួបនោះ ហើយថាតើក្រុមហ៊ុនមានបំណងចង់សម្រេចបានអ្វីតាមរយៈការណាត់ជួបអតិថិជន៕

អត្ថបទដោយ៖ កញ្ញា គីមឆេង

ផ្ទាំងឃោសនាពាណិជ្ជកម្ម no-alternative title
ខ្ញុំគឺជាអ្នកសរសេរអត្ថបទ និងអ្នកទីផ្សារឲ្យគេហទំព័រ apamat.com ហើយខ្ញុំក៏កំពុងធ្វើការជាអ្នកទីផ្សារឲ្យក្រុមហ៊ុនផ្សេងទៀតផងដែរ។ ខ្ញុំចូលចិត្តចែករំលែក ហើយខ្ញុំមកទីនេះគឺដោយសារខ្ញុំចង់ចែករំលែកអ្វីដែលខ្ញុំដឹងអំពីការធ្វើជំនួញ ជាមួយអ្នក។