អ្នក IT ពីរនាក់ ធុញនិងធ្វើការឲ្យគេ ចេញមកបើកក្រុមហ៊ុនខ្លួនឯង ឥឡូវនេះមានតម្លៃប្រហែល ២០ ពាន់លានដុល្លារ

843

ក្រុមហ៊ុនលក់ទំនិញតាមអនឡាញដ៏ធំជាងគេនៅប្រទេសឥណ្ឌា Flipkart ត្រូវបានបង្កើតឡើងនៅឆ្នាំ ២០០៧ ដោយអតីតបុគ្គលិកផ្នែកបច្ចេកទេសពីរនាក់របស់ក្រុមហ៊ុន Amazon.com។ ដោយសារភាពធុញទ្រាន់ធ្វើការឱ្យ Amazon និងដោយមើលឃើញពីភាពរីកចម្រើនក្នុងវិស័យអាជីវកម្មអនឡាញនៅប្រទេសឥណ្ឌា Sachin Bansal និង Binny Bansal បានរួមដៃគ្នាងាកមកបង្កើតវេបសាយលក់ទំនិញអនឡាញ Flipkart ដោយដើមទុនដំបូងចំនួន ៦,៥០០ លុយរូពី។

ផ្ទាំងឃោសនាពាណិជ្ជកម្ម

Sachin និង Binny ជាមនុស្សចូលចិត្តអានសៀវភៅណាស់ ហើយពួកគេចង់ឱ្យ Flipkart ជាកន្លែងមួយដែលអាចបំពេញបំណងប្រាថ្នារបស់អ្នកចូលចិត្តមើលសៀវភៅ។ Flipkart មានន័យថា “ដាក់សម្ភារៈចូលក្នុងទូផ្ទុកទំនិញ” “Flipping things into the cart”Flipkart ដែលមាន Sachin Bansal ជាប្រធានក្រុមហ៊ុន និង Binny Bansal ជានាយកប្រតិបត្តិ រកចំណូលពីការលក់បាន ៤០ លានរូពីគិតពីឆ្នាំ ២០០៨ ដល់ ២០០៩ និងកើនដល់ ២០០ លានរូពីទៀតនៅឆ្នាំបន្ទាប់។ បញ្ហាដែល Flipkart ជួបលើកដំបូងគឺការបង់ប្រាក់តាមអនឡាញ ពីព្រោះមនុស្សភាគច្រើន មិនទាន់មានការទុកចិត្តចំពោះការទូទាត់ប្រាក់តាមអ៊ីនធឺណេតនៅឡើយ។ ប៉ុន្តែ Flipkart បានដោះស្រាយកង្វល់នេះដោយបង្ហាញអតិថិជនពីរបៀបបង់ប្រាក់ដោយប្រើប្រាស់កាត និងរបៀបចែកចាយទំនិញ ហើយ Flipkart ក៏ជាក្រុមហ៊ុនដំបូងគេដែលបង្ហើបពីគំនិតនេះក្នុងប្រទេសឥណ្ឌា។

កាលពីថ្ងៃទី ០៩ ឧសភា កន្លងទៅនេះ ក្រុមហ៊ុន Walmart ដែលជាដៃគូប្រជែងធំបំផុតរបស់ Amazon បានប្រកាសថាខ្លួនបានក្លាយជាម្ចាស់ភាគហ៊ុនធំបំផុត របស់ Flipkart ស្របពេល លោក Binny Bansal ក៏អះអាងដូចគ្នាផងដែរ នៅលើគណនី Twitter ផ្លូវការរបស់គាត់។ ចាប់ផ្តើមពីទស្សនៈ ដែលគ្រាន់តែចង់បង្កើតវេទិកាមួយសម្រាប់អ្នកចូលចិត្តសៀវភៅ ឥឡូវនេះ បានក្លាយជាក្រុមហ៊ុនលំដាប់កំពូលមួយ ដែលអាចផ្គត់ផ្គង់តម្រូវការជាច្រើនដល់អតិថិជន៕

 

អត្ថបទដោយ៖ ស្យែល

ផ្ទាំងឃោសនាពាណិជ្ជកម្ម no-alternative title
ខ្ញុំគឺជាអ្នកសរសេរអត្ថបទ និងអ្នកទីផ្សារឲ្យគេហទំព័រ apamat.com ហើយខ្ញុំក៏កំពុងធ្វើការជាអ្នកទីផ្សារឲ្យក្រុមហ៊ុនផ្សេងទៀតផងដែរ។ ខ្ញុំចូលចិត្តចែករំលែក ហើយខ្ញុំមកទីនេះគឺដោយសារខ្ញុំចង់ចែករំលែកអ្វីដែលខ្ញុំដឹងអំពីការធ្វើជំនួញ ជាមួយអ្នក។