អង្គការមូលនិធិរូបិយវត្ថុអន្ដរជាតិ បានយល់ព្រមផ្តល់កម្ចី ៥០ ពាន់លានដុល្លារដល់ប្រទេសកំណើតរបស់តារាបាល់ទាត់ពិភពលោក Lionel Messi

559

យោងតាមប្រភពពត៌មាន BBC បានផ្សាយថា អង្គការមូលនិធិរូបិយវត្ថុអន្ដរជាតិ ឬ The International Monetary Fund ហៅកាត់ថា IMF បានយល់ព្រមលើសំណើរកម្ចីប្រាក់ ៥០ ពាន់លានដុល្លារអាមេរិក របស់ប្រទេសអាហ្សង់ទីន ខណៈដែលប្រទេសកំណើតរបស់តារាបាល់ទាត់ឆ្នើម Lionel Messi មួយនេះកំពុងព្យាយាមពង្រឹងសេដ្ឋកិច្ចរបស់ខ្លួន។

កិច្ចព្រមព្រៀងនេះមានរយៈពេលបីឆ្នាំ ដែលត្រូវបានអនុម័តដោយក្រុមប្រឹក្សាភិបាលរបស់អង្គការមូលនិធិរូបិយវត្ថុអន្ដរជាតិ IMF។

ចំណែកឯប្រធានាធិបតីរបស់ប្រទេសអាហ្សង់ទីន លោក Mauricio Macri បានរងនូវការរិះគន់យ៉ាងខ្លាំងក្នុងប្រទេស ចំពោះការសម្រេចចិត្តរបស់លោកក្នុងការស្នើសុំជំនួយពីអង្គការមូលនិធិរូបិយវត្ថុអន្ដរជាតិ។

អង្គការមូលនិធិរូបិយវត្ថុអន្ដរជាតិមួយនេះ ក៏ទទួលបានការរងការរិះគន់យ៉ាងខ្លាំង និងត្រូវបានគេបន្ទោសចំពោះការដួលរលំនៃសេដ្ឋកិច្ចអាហ្សង់ទីនកាលពីឆ្នាំ ២០០១ បន្ទាប់ពី IMF បានដកខ្លួនពីការពាក់ព័ន្ធនៅក្នុងប្រទេសនេះ និងបានបដិសេធផ្តល់ការគាំទ្រផ្នែកហិរញ្ញវត្ថុ។

លោកប្រធានាធិបតីរបស់ប្រទេសអាហ្សង់ទីន Mauricio Macri បានមានប្រសាសន៍កាលពីពេលមុនថា ការយល់ព្រមលើសំណើពី IMF បានអនុញ្ញាតឱ្យរដ្ឋាភិបាលរបស់លោកពង្រឹងកម្មវិធីអភិវឌ្ឍន៍ និងការរីកចម្រើនជាបន្តទៀត។ “ការផ្តល់ឱ្យយើងនូវការគាំទ្រដ៏ធំ គឺដើម្បីប្រឈមនិងស្ថានភាពសកលថ្មីនេះ និងដើម្បីគេចចេញពីវិបត្តិដែលយើងធ្លាប់បានជួបប្រទះក្នុងពេលអតីតកាល” លោក Macri បានមានប្រសាសន៍។

គួរបញ្ជាក់ផងដែរថា ប្រទេសអាហ្សង់ទីនធ្លាប់បានស្ថិតក្រោមវិបត្តិសេដ្ឋកិច្ចអស់រយៈពេលជាច្រើនឆ្នាំមកហើយ និងបានស្នើសុំជំនួយពី IMF តាំងពីថ្ងៃ ០៨ ខែ ឧសភា ឆ្នាំ ២០១៨ បន្ទាប់ពីតម្លៃរូបិយប័ណ្ណបន្តធ្លាក់ចុះជាលំដាប់៕

អត្ថបទដោយ៖ Ciel

 

 

 

 

 

ផ្ទាំងឃោសនាពាណិជ្ជកម្ម
សួស្តី! ខ្ញុំគឺជាអ្នកសរសេរអត្ថបទឱ្យ Apamat.com និងប្រែសម្រួលអត្ថបទណាទាក់ទងនិងអ្នកជំនួញល្បីៗ ជាពិសេសរបៀបក្នុងការសម្រេចជោគជ័យ ព្រមទាំងបទពិសោធន៍បរាជ័យរបស់ពួកគេ។ សម្រាប់ទស្សនៈខ្ញុំផ្ទាល់ ខ្ញុំយល់ថា ការធ្វើអាជីវកម្មគឺជាថ្នាំដ៏ស័ក្តិសិទ្ធិមួយដែលអាចកែប្រែទំនាស់ផលប្រយោជន៍រវាងមនុស្សនិងមនុស្ស។ សូមអរគុណចំពោះចំណាប់អារម្មណ៍ និងពេលវេលាដ៏មានតម្លៃរបស់អ្នកក្នុងការអានអត្ថបទរបស់ខ្ញុំ៕