កាលៈទេសៈ ៣ ដែលអ្នកត្រូវបង្ខំចិត្តធ្វើការដើម្បីតែប្រាក់ខែ

642

ពាក្យថា “ធ្វើការដើម្បីលុយ ឫ ដើម្បីតែប្រាក់ខែ” ត្រូវបានសង្គមនាពេលបច្ចុប្បន្នយល់ថាជារឿងមិនត្រឹមត្រូវ ព្រោះវាអាចធ្វើឱ្យមនុស្សឆាប់ធុញទ្រាន់និងការងារ។

យ៉ាងណាមិញ អ្នកស្រី Suzy Welch ដែលជាសហស្ថាបនិករបស់ស្ថាប័ន Jack Welch Management Institute ជាអ្នកការសែតអាជីវកម្ម ពិធីការនីទូរទស្សន៍ និងជាអ្នកនិយាយសាធារណៈផងនោះ បានគិតផ្ទុយវិញថា ការធ្វើការដើម្បីតែប្រាក់ខែមិនមែនជារឿងអាក្រក់ទេ បើអ្នកធ្លាក់ក្នុងស្ថានភាព ៣ នេះ៖

១. អ្នកកំពុងជួបវិបត្តិហិរញ្ញវត្ថុធ្ងន់

ការបំពេញការងារដើម្បីតែប្រាក់ខែគឺជារឿងសមហេតុផល ប្រសិនបើអ្នកធ្លាក់ក្នុងស្ថានភាពមួយដែលតម្រូវឱ្យអ្នកធ្វើការតស៊ូដើម្បីបំពេញតម្រូវការចាំបាច់។ ឃ្លានេះ អ្នកស្រី Suzy Welch ចង់សម្តៅដល់កាលៈទេសៈ ដែលមនុស្សភាគច្រើនហៅថា do-or-die” ដែលបង្ខំឱ្យមនុស្សប្រឹងប្រែងធ្វើការដើម្បីយកប្រាក់មកដោះបំណុល ឫ ដើម្បីដោះទាល់បន្ទាន់ណាមួយ។ អ្នកស្រីបន្តទៀតថា ក្នុងស្ថានភាពបែបនេះ អ្នកត្រូវខំរកលុយឱ្យច្រើនតាមដែលអ្នកអាចធ្វើបាន។

២. អ្នកមានផែនការផ្ទាល់ខ្លួន

អ្នកធ្វើការដើម្បីតែប្រាក់ខែ មិនមែនមានន័យថា ពួកគេជាមនុស្សមើលឃើញតែប្រាក់ធំជាងអ្វីៗទាំងអស់នោះទេ។ ប៉ុន្តែពួកគេធ្វើបែបនេះ ដោយសារតែពួកគេមានគម្រោងមួយដែលតម្រូវឱ្យពួកគេប្រឹងប្រែងប្រមូលដើមទុនមកបង្កើតអាជីវកម្មផ្ទាល់ខ្លួន ឫធ្វើអ្វីមួយដែលអាចជួយឱ្យពួកគេគេចចេញពីភាពជា “ទាសករការងារ” ដែលចាំតែធ្វើការឱ្យគេ។ ស្ថិតក្នុងស្ថានភាពនេះ អ្នកមិនគួរខ្លាចពាក្យរិះគន់ពីអ្នកដទៃឡើយ ព្រោះអ្នកដឹងច្បាស់ថាអនាគតរបស់អ្នកនឹងទៅជាយ៉ាងណា។

៣. អ្នកត្រូវការកែប្រែស្ថានភាពរស់នៅបច្ចុប្បន្នរបស់អ្នក

មនុស្សមួយចំនួនត្រូវខិតខំធ្វើការទាំងលំបាករាល់ថ្ងៃដើម្បីប្រមូលប្រាក់មកអភិវឌ្ឍស្ថានភាពរស់នៅប្រចាំថ្ងៃរបស់ពួកគេក្នុងសង្គម។ ពួកគេពិតជាមានអារម្មណ៍រអៀសខ្លួនណាស់ ប្រសិនបើពួកគេត្រូវបានគេរិះគន់ ឫ ឮពាក្យចរចាមអារាមណាដែលនិយាយអំពីពួកគេថា “ធ្វើការរាប់ឆ្នាំហើយ មិនឃើញសល់អ្វីសោះ”។ សម្រាប់អ្នកស្រី Suzy វិញ យល់ថា វាគ្មានអ្វីត្រូវរារែកទៀតទេដែលអ្នកត្រូវធ្វើការមួយថ្ងៃ ១០ ម៉ោងដើម្បីបំពេញបេសកកម្មរបស់អ្នក។

“ខ្ញុំពិតជាឆ្គួតដែលត្រូវនិយាយថា ចំណូលដែលបានមកពីការងារគឺមិនមានបញ្ហាដល់អ្នក។ ប៉ុន្តែ ប្រសិនបើប្រាក់ជាអ្វីៗដែលការងារផ្តល់ឱ្យ អ្នកត្រូវប្រាកដថា វាមានតម្លៃសម្រាប់អ្នកចំពោះហេតុផលមួយចំនួនប៉ុណ្ណោះ។ អ្នកត្រូវរកមើលអ្វីដែលថ្មី និងមានតម្លៃជាងនេះសម្រាប់ជីវិតរបស់អ្នក។” អ្នកស្រី Suzy Welch បានប្រាប់ដូច្នេះដល់ CNBC Make It

ទោះជាយ៉ាងណា បុគ្គលជោគជ័យជាច្រើនក្នុងពេលបច្ចុប្បន្នយល់ថា ដើម្បីសម្រេចបានសុភមង្គលពិតប្រាកដ មិនមែនពឹងផ្អែកលើប្រាក់ខែខ្ពស់របស់ការងារនោះទេ៕

ផ្ទាំងឃោសនាពាណិជ្ជកម្ម
សួស្តី! ខ្ញុំគឺជាអ្នកសរសេរអត្ថបទឱ្យ Apamat.com និងប្រែសម្រួលអត្ថបទណាទាក់ទងនិងអ្នកជំនួញល្បីៗ ជាពិសេសរបៀបក្នុងការសម្រេចជោគជ័យ ព្រមទាំងបទពិសោធន៍បរាជ័យរបស់ពួកគេ។ សម្រាប់ទស្សនៈខ្ញុំផ្ទាល់ ខ្ញុំយល់ថា ការធ្វើអាជីវកម្មគឺជាថ្នាំដ៏ស័ក្តិសិទ្ធិមួយដែលអាចកែប្រែទំនាស់ផលប្រយោជន៍រវាងមនុស្សនិងមនុស្ស។ សូមអរគុណចំពោះចំណាប់អារម្មណ៍ និងពេលវេលាដ៏មានតម្លៃរបស់អ្នកក្នុងការអានអត្ថបទរបស់ខ្ញុំ៕