ក្រុមហ៊ុនចិនចាប់ដៃគូជាមួយក្រុមហ៊ុនក្នុងស្រុក សាងសង់រីសតតម្លៃ $360 លាននៅខេត្តព្រះសីហនុ

1698
ឆ្នេរអូត្រេះ by Lonely Planet

ក្រុមហ៊ុន Suncity Group ដែលជាក្រុមហ៊ុនសេវាកម្មកម្សាន្ត និងកាស៉ីណូ ចុះបញ្ចីក្នុងផ្សារហ៊ុនហុងកុង បានព្រមព្រៀងជាដៃគូយុទ្ធសាស្ត្រជាមួយក្រុមហ៊ុនក្នុងស្រុកមួយឈ្មោះ Golden Sun Sky Entertainment ក្នុងគម្រោងសាងសង់រីសតមួយក្នុងខេត្តព្រះសីហនុ។ ក្រុមហ៊ុន Suncity បាននិយាយថា ទុនវិនិយោគសម្រាប់គម្រោងនេះមានចំនួន 360 លានដុល្លារអាមេរិច។

ឯកសារមួយនៅផ្សារហ៊ុនទីក្រុងហុងកុង (HKEK) បានបង្ហាញកាលពីថ្ងៃពុធកន្លងទៅថា ភាពជាដៃគូនេះរួមមានការផ្តល់សេវាប្រឹក្សាយោបល់ និងសេវាកម្មគ្រប់គ្រងលើរីសតដែលមានទំហំ 650,000 ម៉ែត្រក្រឡា ដែលគ្រោងនឹងបញ្ចប់ការសាងសង់នៅចុងឆ្នាំក្រោយ។

ប្រធានក្រុមហ៊ុន Suncity លោក Chau Cheok Wa បាននិយាយថា “​​ក្រុម​​ហ៊ុន​​ជឿ​ជាក់​ថា​ការ​ចូល​ក្នុង​កិច្ច​ព្រម​ព្រៀង​ភាព​ជា​ដៃ​គូ​យុទ្ធ​សាស្ដ្រ​ នឹង​ពង្រីក​ទី​តាំង​ឈរ​ជើង​របស់​​ខ្លួន​នៅ​​ក្នុង​ប្រទេស​កម្ពុជា ​បន្ថែម​​លើ​គម្រោង​រមណីយ​ដ្ឋាន​ពាណិជ្ជ​កម្ម​ចម្រុះ​នៅ​ក្នុង​ប្រទេសវៀត​ណាម​”។

កាលពីខែមុន ក្រុមហ៊ុន Suncity បានប្រកាសថាខ្លួនបានទិញយកក្រុមហ៊ុនអភិវឌ្ឍរីសតមួយរបស់វៀតណាមឈ្មោះ Star Admiral Limited។

ក្រុមហ៊ុន Golden Sun Sky បាន​ចុះ​បញ្ជី​នៅ​ក្រសួង​ពាណិជ្ជ​កម្ម​កម្ពុជា​ កាល​ពី​ខែ​មីនា​ ឆ្នាំ ២០១៧ ហើយ​រកស៉ីលើ​អាជីវ​កម្ម​​សណ្ឋា​គារ និង​រមណីយ​ដ្ឋាន។ តាមឯកសារ​ចុះ​បញ្ជីរបស់ក្រុមហ៊ុននេះបានបង្ហាញថា ​វាមាន​ទី​តាំង​នៅ​ភូមិ​លេខ ៦ សង្កាត់​លេខ ៤ នៅ​ក្រុង​ព្រះសីហនុ​។​

អភិបាលខេត្តព្រះសីហនុ លោក យន្ត មីន បានឲ្យដឹងថាលោកបានដឹងពីគម្រោងវិនិយោគនេះ ប៉ុន្តែមិនអាចផ្តល់ពីទីតាំងជាក់លាក់ដែលគម្រោងនេះនឹងសាងសង់នោះទេ។

លោកអភិបាលខេត្តបានបន្ថែមថា នៅខេត្តព្រះសីហនុបច្ចុប្បន្ននេះមានរីសតចំនួន 30 និងកាស៉ីណូចំនួន 40 ហើយភាគច្រើនគឺជារបស់ចិន។ លោកបាននិយាយទៀតថា អ្វីដែលគួរឲ្យចាប់អារម្មណ៍ថ្មីៗនេះ នៅខេត្តព្រះសីហនុគឺកំពុងតែបង្កើតឱកាសការងារថ្មីៗ និងបង្កើនសកម្មភពធ្វើពាណិជ្ជកម្ម។

លោកបានបន្តទៀតថា “អ្នកទេសចរណ៍មកកាន់តែច្រើន អ្នកវិនិយោគនាំយកលុយមកកាន់តែច្រើន ប៉ុន្តែក៏មានបញ្ហាកាន់តែច្រើនដូចគ្នា”។ លោកបានទទួលស្គាល់ថា លំហូរចូលនៃភ្ញៀវទេសចរ និងវិនិយោគិនចិនបានជំរុញឱ្យតម្លៃដីធ្លី តម្លៃស្នាក់នៅកើនឡើង និងមានផលប៉ះពាល់ជាអវិជ្ជមានដល់ភ្ញៀវទេសចរក្នុងស្រុកដែរ។

លោកបាននិយាយទៀតថា «យើងសង្ឃឹមថានៅពេលអនាគតសណ្ឋាគារ និងផ្ទះសំណាក់ជាច្រើនត្រូវបានកសាងឡើងដើម្បីបំពេញតាមតម្រូវការ ហើយវានឹងជួយធ្វើឲ្យតម្លៃថយចុះ»។ នេះបើតាមការផ្សាយរបស់កាសែត PhnomPenh Post។

កាលពីឆ្នាំមុនខេត្តនេះបានស្វាគមន៍ភ្ញៀវទេសចរជិត 2 លាននាក់ ដែលមានភ្ញៀវទេសចរចំនួន 1,5 លាននាក់មកពីបរទេស៕

ផ្ទាំងឃោសនាពាណិជ្ជកម្ម
ខ្ញុំគឺជាអ្នកសរសេរអត្ថបទ និងអ្នកទីផ្សារឲ្យគេហទំព័រ apamat.com ហើយខ្ញុំក៏កំពុងធ្វើការជាអ្នកទីផ្សារឲ្យក្រុមហ៊ុនផ្សេងទៀតផងដែរ។ ខ្ញុំចូលចិត្តចែករំលែក ហើយខ្ញុំមកទីនេះគឺដោយសារខ្ញុំចង់ចែករំលែកអ្វីដែលខ្ញុំដឹងអំពីការធ្វើជំនួញ ជាមួយអ្នក។