យុទ្ធសាស្ត្រកំណត់ថ្លៃ សម្រាប់អាជីវកម្មខ្នាតតូច

8480

យុទ្ធសាស្ត្រកំណត់ថ្លៃនៃអាជីវកម្មខ្នាតតូចរបស់អ្នកអាចកំណត់ភាពរីកលូតលាស់របស់អ្នកបាន។ ម្ចាស់អាជីវកម្មខ្នាតតូច អាចធានាភាពរីកចម្រើនរយៈពេលវែងតាមរយៈអត្រាភាពចំណេញពីយុទ្ធសាស្ត្រកំណត់ថ្លៃលើផលិតផល ឬសេវាកម្មដែលខ្លួនមាន។ 

ភាគច្រើន នៅក្នុងគម្រោងអាជីវកម្ម យុទ្ធសាស្ត្រកំណត់ថ្លៃត្រូវបានគេផ្តោតលើការកំណត់ឲ្យទាបជាងគេនៅក្នុងទីផ្សារ។ ចំណុចនេះ គឺដោយសារការផ្តោតលើគូប្រជែង ហើយគិតថាអាចយកឈ្នះគូប្រជែងបានតាមរយៈការលក់ក្នុងតម្លៃទាបជាង។

ការកំណត់តម្លៃទាប មិនមែនមានន័យថាសុទ្ធតែអាចឈ្នះនោះទេ

ការទម្លាក់តម្លៃផលិតផល ឬសេវាកម្ម មិនមែនជាយុទ្ធសាស្ត្រឈ្នះៗនោះទេសម្រាប់អាជីវកម្មខ្នាតតូច។ តម្លៃដែលអាចធ្វើឲ្យអតិថិជនមកទិញអ្នកបាន អាចជាការផ្តល់សេវាកម្មល្អ លក្ខណពិសេសរបស់អ្នក និងយីហោ ដែលពួកគាត់រីករាយនឹងទិញអ្នក។ គូប្រជែងធំៗដែលមានទុនច្រើន ពួកគេមានលទ្ធភាពទម្លាក់ការចំណាយក្នុងប្រតិបត្តិការរបស់ពួកគេ ហើយពួកគេអាចសម្លាប់អាជីវកម្មខ្នាតតូចដែលអាចត្រឹមតែទម្លាក់តម្លៃលក់ចេញបានយ៉ាងងាយ។ ជៀសវាងប្រើយុទ្ធសាស្ត្រទម្លាក់តម្លៃ អ្នកគួរចាប់ផ្តើមមើលពីតម្រូវការនៅក្នុងទីផ្សារ តាមរយៈចំណុចទាំងបីខាងក្រោម៖

១. វិភាគលើការប្រកួតប្រជែង៖ កុំមើលតែតម្លៃគូប្រកួតប្រជែងរបស់អ្នក ត្រូវមើលលើគ្រប់ជ្រុងរបស់គេ។ តើពួកគេកំពុងតែលក់ផ្តោតលើក្រុមអាតិថិជនប្រភេទណា? តើពួកគេផ្តល់តម្លៃអ្វីឲ្យអតិថិជន ក្រៅពីតែគិតតម្លៃពីអតិថិជនដែរទេ? តើអ្នកប្រៀបធៀបរវាងអ្នក និងគេដោយរបៀបណាដែរ

២. កំណត់ពិដានតម្លៃ ឬតម្លៃខ្ពស់បំផុត៖ ពិដានតម្លៃគឺជាតម្លៃខ្ពស់បំផុតនៅក្នុងទីផ្សារ ដែលអតិថិជនអាចទិញបើវាមានតម្លៃក្នុងកម្រិតនោះចុះក្រោម។ ឧទាហរណ៍ថា កាហ្វេមួយកែវមានធម្មតា $3.5 ហើយតម្លៃខ្ពស់បំផុតរបស់វាគឺ $4.5 ក្នុងមួយកែវ។ មានន័យថាបើកាហ្វេមួយកែវនោះឡើងតម្លៃលើសពី $4.5 វានឹងលែងមានអ្នកទិញ។ អ្នកគួរធ្វើការស្រាវជ្រាវ ឬវាស់ស្ទង់ ថាអតិថិជនរបស់អ្នកហ៊ានទិញត្រឹមតម្លៃប៉ុណ្ណា។ តម្លៃខ្ពស់បំផុតនៅក្នុងទីផ្សារ មិនមែនមានន័យថាសុទ្ធតែជាពិដានតម្លៃនោះទេ។

៣. តម្លៃដែលអាចបត់បែនបាន (Price Elasticity), យោងតាមសាលា Harvard បានបង្ហាញថា៖

អតិថិជនភាគច្រើននៅក្នុងទីផ្សារ មានការយល់ដឹងពីតម្លៃនៃផលិតផល ឬសេវាកម្ម។ មនុស្សកាន់តែច្រើននឹងទិញផលិតផល ឬសេវាកម្ម ប្រសិនបើវាមានតម្លៃថោក ហើយមនុស្សកាន់តែតិចនឹងទិញវា បើវាមានតម្លៃថ្លៃជាងមុន។ ប៉ុន្តែ … ភាពបត់បែនតំលៃបង្ហាញយ៉ាងច្បាស់ថា តើតម្រូវការរបស់អតិថិជនឆ្លើយតបចំពោះផលិតផលដែលផ្អែកលើតម្លៃរបស់វាដែរឬទេ។

ផលិតផលមួយចំនួនមានការឆ្លើយតបភ្លាមៗ នៅពេលតម្លៃមានការផ្លាស់ប្តូរខុសពីតម្លៃតាមធម្មតា ដោយសារតែមនុស្សគិតថាវាមិនសំខាន់ ឬដោយសារតែមានផលិតផលជំនួសជាច្រើនទៀត។ ឧទាហរណ៍ថា នៅពេលសាច់គោឡើងថ្លៃយ៉ាងខ្លាំង តម្រូវការអាចធ្លាក់ចុះ ដោយសារតែមនុស្សអាចឈប់ទិញសាច់គោ ហើយងាកទៅទិញសាច់មាន់ ឬសាច់ជ្រូកមកបរិភោគជំនួសវិញ។

ជៀសឲ្យឆ្ងាយពីសង្គ្រាមប្រកួតប្រជែងតម្លៃ

  1. ព្យាយាមផ្តាច់មុខលើផលិត ឬសេវាកម្មណាមួយ៖ បើអ្នកមានផលិត ឬសេវាកម្មតែឯង អ្នកអាចកំណត់តម្លៃទាប ឬខ្ពស់តាមចិត្តអ្នក ប៉ុន្តែត្រូវគិតពីលទ្ធផលនៃការសម្រចចិត្តនោះ។ 
  2. ផ្តោតលើការផ្តល់សេវាកម្មល្អដល់អតិថិជន៖ នៅហាងខ្លះលក់តម្លៃទាប តែនៅពេលអតិថិជនទៅទិញ សួរមិនចង់ឆ្លើយ មុខក្រម៉ូវ ទៅទិញម្តងលែងចង់ទៅរហូត។ មានហាងខ្លះលក់ថ្លៃជាងគេបន្តិច តែមានអ្នកទៅទិញច្រើនដោយសារអ្នកលក់រាក់ទាក់ដាក់អតិថិជន ពេលគេចូលទិញហើយចង់ទៅទិញទៀត ទិញដោយសប្បាយចិត្ត។ ទាំងនេះគឺជាភស្តុតាងដែលបញ្ចាក់ថា ការទម្លាក់តម្លៃមិនមែនជាជម្រើសឈ្នះនោះទេ។
  3. លក្ខណៈពិសេសផ្តាច់មុខ៖ នៅក្នុងអាជីវកម្មនីមួយៗមានអ្វីពិសេសម៉្យាង ដែលអាជីវកម្មផ្សេងទៀតមិនមាន ហើយវាក៏ជាហេតុផលមួយដែលធ្វើឲ្យអតិថិជនរើសយកអ្នកផងដែរ។
  4. យីហោរ (Brand)៖ ឧទាហរណ៍ងាយយល់មួយ គឺហាងកាហ្វេរ Brown ដែលជាហាងជោគជ័យជាងគេនៅក្នុងស្រុក។ បើនិយាយពីរសជាតិ គឺមិនលើសពីហាងផ្សេងទៀតប៉ុន្មានទេ ប៉ុន្តែហេតុអ្វី Brown លក់បានថ្លៃជាងគេ? ចម្លើយគឺដោយសារ Brand របស់ Brown ខ្លាំងជាងគេ។ ការមានអ្នកអភិវឌ្ឍយីហោ ឬហៅជាភាសាអង់គ្លេសថា Brand Developer គឺចំណុចខ្លាំងមួយក្នុងការប្រកួតប្រជែង។

អាជីវកម្មខ្នាតតូចដែលមានយុទ្ធសាស្ត្រកំណត់ថ្លៃល្អ មិនងាយស្រួលក្នុងការបំបាក់បាននោះទេ ទោះជាអាជីវកម្មខ្នាតកណ្តាល ឬខ្នាតធំចង់បំបាក់ក៏ដោយ។ អ្នកត្រូវប្រុងប្រយ័ត្នក្នុងការសម្រេចចិត្តលើការកំណត់ថ្លៃទំនិញ ឬសេវាកម្មរបស់អ្នក ព្រោះថាអាជីវកម្មរបស់អ្នកពឹងផ្អែកលើវាច្រើន៕

ផ្ទាំងឃោសនាពាណិជ្ជកម្ម
ខ្ញុំគឺជាអ្នកសរសេរអត្ថបទ និងអ្នកទីផ្សារឲ្យគេហទំព័រ apamat.com ហើយខ្ញុំក៏កំពុងធ្វើការជាអ្នកទីផ្សារឲ្យក្រុមហ៊ុនផ្សេងទៀតផងដែរ។ ខ្ញុំចូលចិត្តចែករំលែក ហើយខ្ញុំមកទីនេះគឺដោយសារខ្ញុំចង់ចែករំលែកអ្វីដែលខ្ញុំដឹងអំពីការធ្វើជំនួញ ជាមួយអ្នក។