Jack Ma:“បែបបទនៃជីវិតមិនមែនស្ថិតលើថា តើអ្នកសម្រេចអ្វីបានច្រើនប៉ុណ្ណានោះទេ ប៉ុន្តែវាកំណត់ដោយកំហុសនិងពេលវេលាដ៏លំបាកដែលអ្នកបានឆ្លងកាត់”

2221

ក្រោយពីលេចឭដំណឹងលារលែងពីតំណែងជា CEO របស់ម្ចាស់ក្រុមហ៊ុនលក់ទំនិញអនឡាញខ្នាតយក្សចិន Alibaba លោក Jack Ma​ បានធ្វើឱ្យពិភពលោកមានភាពភ្ញាក់ផ្អើលយ៉ាងខ្លាំង ប៉ុន្តែរឿងនេះលោកធ្លាប់បានប្រាប់ម្តងរួចមកហើយ។

តាមការប្រកាសជាផ្លូវការរបស់ក្រុមហ៊ុន Alibaba កាលពីថ្ងៃទី ១០ ខែ កញ្ញា កន្លងទៅថា សហស្ថាបនិកលោក Jack Ma នឹងដើរចេញពីតំណែងជានាយកប្រតិបត្តិនៅថ្ងៃទី ១០ កញ្ញា ឆ្នាំ ២០១៩ ខាងមុខ។

លោក Ma ដែលមានអតីតភាពជាគ្រូបង្រៀនភាសាអង់គ្លេសធ្លាប់មានប្រសាសន៍ថា នៅអាយុខ្ទង់ ២០ គឺជាពេលត្រូវសិក្សារៀនសូត្រ។ ចន្លោះពីវ័យ ៣០ ទៅ ៤០ ឆ្នាំ គឺជាពេលដែលត្រូវសាកល្បងប្រឈមនិងហានិភ័យ។ ចំណែកអាយុចាប់ពី ៥០ ឆ្នាំឡើងទៅគឺជាវេលាដែលត្រូវធ្វើអ្វីដែលអ្នកពូកែធ្វើបំផុតនិងផ្ទេរចំណេះដឹងដល់ក្មេងជំនាន់ក្រោយ។

លោក Ma បានចំណាយពេលជាច្រើនបង្កើតសមាគមន៍អប់រំមួយនៅឆ្នាំ ២០១៤ ឈ្មោះ The Jack Ma Foundation ដើម្បីជាផ្នែកមួយក្នុងការលើកកម្ពស់ប្រព័ន្ធអប់រំនៅតាមទីជនបទក្នុងប្រទេសចិន។

ថ្ងៃទី ១០ ខែ កញ្ញ ឆ្នាំ ២០១៨ គឺជាថ្ងៃប្រទេសចិនប្រារព្ធទិវាជាតិគ្រូបង្រៀន ហើយក៏ថ្ងៃដែលលោក Jack ឈានចូលវ័យ ៥៤ ឆ្នាំផងដែរ។ លោក Ma បន្តទៀតថា លោកពិតជានឹកនាដល់គ្រាដែលធ្វើជាគ្រូបង្រៀនខ្លាំងណាស់ ហើយមិនយូរទេលោកនឹងត្រឡប់ទៅធ្វើជាគ្រូអប់រំវិញដែលនេះគឺជាអ្វីដែល Ma គិតថាលោកពូកែធ្វើជាងតំណែងនាយកប្រតិបត្តិក្រុមហ៊ុន។

ការមកដល់ក្នុងវិស័យជំនួញហាក់ដូចជារឿងដ៏ចៃដន្យមួយសម្រាប់ Jack Ma បន្ទាប់ពីគាត់ត្រូវបានគេបដិសេធមិនទទួលឱ្យចូលបម្រើការងារក្នុងក្រុមហ៊ុនជាង ៣០ កន្លែង។

បែបបទនៃជីវិតមិនមែនស្ថិតលើថាតើអ្នកសម្រេចអ្វីបានច្រើនប៉ុណ្ណានោះទេ ប៉ុន្តែវាកំណត់ដោយកំហុសនិងពេលវេលាដ៏លំបាកដែលអ្នកបានឆ្លងកាត់។ ប្រសិនបើអ្នកចង់ជោគជ័យ កុំរៀនតាមប្រវត្តិជោគជ័យ តែត្រូវរៀនពីកំហុសរបស់មនុស្ស។លោកម៉ាបានប្រាប់ដូច្នេះដល់ក្រុមអ្នកដឹកនាំវ័យក្មេងជំនាន់ក្រោយក្នុងជំនួបប្រចាំឆ្នាំនៃកម្មវិធី World Economic Forum ដែលបានប្រព្រឹត្តិ៍ទៅនៅខែ មករា ឆ្នាំ ២០១៨ ក្នុងទីក្រុង ដាវ៉ូស ប្រទេសស្វីស។

Jack បន្ថែមទៀតថាចន្លោះពីវ័យ ២០ ទៅ ៣០ អ្នកគួរដើរស្វែងរកចៅហ្វាយល្អមួយ និងចូលបម្រើការងារក្នុងក្រុមហ៊ុនណាមួយដើម្បីរៀនសូត្រ ចន្លោះពី ៣០ ទៅ ៤០ ឆ្នាំ ប្រសិនបើអ្នកចង់ធ្វើអ្វីដោយខ្លួនឯង ចូរធ្វើវាភ្លាម បើទោះជាអ្នកនឹងបរាជ័យក៏ដោយ អ្នកនៅតែមានពេលស្រោចស្រង់មកវិញបាន។ នៅពេលអ្នកមានវ័យ ៤០ ទៅ ៥០ អ្នកគប្បីផ្តោតធ្វើរឿងណាដែលអ្នកជំនាញបំផុត។ លុះដល់អាយុពី ៥០ ទៅ ៦០ ឆ្នាំ នេះជាពេលដែលអ្នកត្រូវផ្ទេរចំណេះដឹងដល់មនុស្សជំនាន់ក្រោយ។ រីឯវ័យចាប់ពី ៦០ ឡើងទៅ អ្នកគួរតែនៅជាមួយកូនចៅរបស់អ្នកនេះបើតាមដំបូន្មានរបស់ម្ចាស់ក្រុមហ៊ុន Alibaba

ទោះជាយ៉ាងណា Jack ធ្លាប់បានគិតថាខ្លួនលោកគឺជាមនុស្សបរាជ័យម្នាក់មុនពេលឈានដល់វ័យ ៣០ ឆ្នាំ ប៉ុន្តែគាត់មិនដែលគិតថាចង់បោះបង់ការតស៊ូនោះទេ។ គាត់បានព្យាយាមក្រោកឈរប្រជែងនិងខ្លួនឯង ពុះពារគ្រប់ឧបសគ្គទាំងអស់ ហើយនឹកស្រមៃពីរូបភាពដែលគាត់ចង់បាននារយៈពេល ១០ បន្ទាប់។ មិនថាអ្នកឆ្លាតប៉ុណ្ណា អ្នកនៅតែអាចប្រព្រឹត្តិ៍កំហុស។ បន្ទាប់មកទៀតអ្នកនឹងត្រូវរៀនពីកំហុសនោះ ហើយមិនមែនដោយសារតែអ្នកនឹងអាចគេចពីវាបានទេ តែផ្ទុយទៅវិញ អ្នករៀនគឺដើម្បីតតាំងនិងវា” លោក Ma បាននិយាយដូច្នេះ៕

ប្រភព៖ CNBC

ផ្ទាំងឃោសនាពាណិជ្ជកម្ម
សួស្តី! ខ្ញុំគឺជាអ្នកសរសេរអត្ថបទឱ្យ Apamat.com និងប្រែសម្រួលអត្ថបទណាទាក់ទងនិងអ្នកជំនួញល្បីៗ ជាពិសេសរបៀបក្នុងការសម្រេចជោគជ័យ ព្រមទាំងបទពិសោធន៍បរាជ័យរបស់ពួកគេ។ សម្រាប់ទស្សនៈខ្ញុំផ្ទាល់ ខ្ញុំយល់ថា ការធ្វើអាជីវកម្មគឺជាថ្នាំដ៏ស័ក្តិសិទ្ធិមួយដែលអាចកែប្រែទំនាស់ផលប្រយោជន៍រវាងមនុស្សនិងមនុស្ស។ សូមអរគុណចំពោះចំណាប់អារម្មណ៍ និងពេលវេលាដ៏មានតម្លៃរបស់អ្នកក្នុងការអានអត្ថបទរបស់ខ្ញុំ៕