តើអ្នកចង់បានអតិថិជនច្រើនជាងមុនដែរឬទេ?

2551

បើផ្អែកតាមលោក Dan Lok អតិថិជនគឺត្រូវបានបែងចែកជាប្រាំថ្នាក់នៅក្នុងពីរ៉ាមីតមួយដោយ 3% នៅខាងលើគេគឺជាភ្ញៀវដែលកំពុងតែត្រូវការហើយប្រាកដថានឹងទិញទំនិញឬសេវាដែលមាននៅក្នុងទីផ្សារនោះភ្លាមដោយមិនបាច់រងចាំឬពិចារណាច្រើនឡើយ។ កំហុសរបស់អ្នកលក់ភាគច្រើនដែលរាំងស្ទះមិនអោយគាត់ទទួលបានអតិថិជនកាន់តែច្រើននោះគឺគាត់ផ្ដោតពេលនិងការទាក់ទាញចំណាប់អារម្មណ៍ទាំងអស់ទៅលើអតិថជននៅកំពូល 3% នេះដោយមិនបានផ្ដោតទៅលើអតិថិជនគោលដៅផ្សេងទៀត។ បន្ទាប់ពីនឹងគឺអតិថិជន 7% ទៀតដែលពួកគាត់មានលទ្ធភាពនឹងទិញហើយចាប់អារម្មណ៍លើទំនិញឬសេវាកម្មរបស់យើង អ្វីដែលគាត់ត្រូវការបន្ថែមគឺចង់សួរសំណួរសំខាន់ៗមកកាន់យើងមុននឹងសម្រេចចិត្តទិញ។

មានអាជីវកម្មខ្លះក៏ព្យាយាមលក់ទៅអោយអតិថិជន 7% ប៉ុន្ដែបើប្រៀបទៅនឹងអ្នកមិនធ្វើគឺមានចំនួនតិចជាងឆ្ងាយ។ បន្ដមកទៀតនោះគឺអតិថជន 30% ទៀតដែលគាត់អាចនឹងទិញតែមិនចាំបាច់ខ្លាំងសម្រាប់ពេលនេះ។ ពួកគាត់ព្រមស្ដាប់ពីការបកស្រាយអំពីផលិតផល ហើយប្រសិនបើអ្នកនិយាយត្រូវបញ្ចុះបញ្ចូលត្រូវចំនុចអាចធ្វើអោយគាត់ចាប់អារម្មណ៍បាន ពេលណាមួយគាត់នឹងទិញផលិតផលរបស់អ្នក។ ក្រោមទៀតនោះគឺអតិថជន 30% ទៀតដែលពួកគាត់មិនចាប់អារម្មណ៍ឬមិនដែលដឹងថាផលិតផលឬសេវាកម្មរបស់យើងមាននៅលើទីផ្សារ ហើយបើគាត់បានដឹងពីវាក៏គាត់មិនទិញភ្លាមៗដែរគឺត្រូវរងចាំពេលយូរជាងអតិថិជនមុនៗ។ និងចុងក្រោយ 30% គឺជាអតិថិជនដែលដាច់ខាតគឺគាត់មិនទិញឬចាប់អារម្មណ៍លើផលិតផលរបស់យើងឡើយ ដូចនេះអ្នកមិនចាំបាច់ចំណាយពេលច្រើនជាមួយពួកគាត់ទេព្រោះនាំតែខាតពេលរបស់យើង។ 

ឧទាហរណ៍ថាអ្នកកំពុងលក់អចលនទ្រព្យ មានអតិថិជនតែ 3% ប៉ុណ្ណោះដែលកំពុងត្រូវការផ្ទះសម្រាប់នៅភ្លាមៗ ដូចជាអ្នកដែលផ្លាស់ប្ដូរទីលំនៅ អ្នកទើបតែលក់ផ្ទះចាស់ចោលហើយរកទិញផ្ទះថ្មី…។ អតិថិជន 7% កំពុងតែចង់ផ្លាស់ប្ដូរផ្ទះ ហើយកំពុងដើរស្វែងរកដោយមិនបន្ទាន់ពេកទេ តែគាត់ប្រាកដថានឹងត្រូវរើចេញទៅផ្ទះថ្មីនៅពេលប៉ុន្មានខែខាងមុខទៀត។  30% បន្ដទៀតគឺគាត់មិនចាំបាច់ផ្លាស់ប្ដូរទីលំនៅ តែប្រសិនបើផ្ទះដែលគាត់កំពុងតែនៅត្រូវបានគេទិញក្នុងតម្លៃខ្ពស់ ហើយផ្ទះដែលអ្នកកំពុងតែលក់មានតម្លៃសមរម្យនិងមានទីតាំងល្អ គាត់អាចនឹងលក់ផ្ទះចាស់ហើយទិញពីយើងដើម្បីទៅនៅបាន។ 30% បន្ទាប់មកទៀតគឺគាត់មិនត្រូវការផ្ទះថ្មីទេ តែប៉ុន្មានឆ្នាំពេលកូនៗគាត់ធំឡើយហើយរៀបការ ប្រហែលជាគាត់ត្រូវការផ្ទះថ្មីអោយកូនរបស់គាត់។ និង 30% ចុងក្រោយគឺគាត់ដាច់ខាតមិនដូរផ្ទះ គាត់នឹងនៅដល់ចាស់និងស្លាប់នៅក្នុងផ្ទះរបស់គាត់តែម្ដង។ 

ប្រសិនបើអ្នកធ្វើទីផ្សារទៅលើតែអតិថិជន 3% ខាងលើគេនោះអ្នកបានធ្វើអោយបាត់បង់អតិថិជនគោលដៅ 67% ផ្សេងទៀតដែលនេះមិនសូវជាល្អឡើយសម្រាប់ការរកស៊ីរយៈពេលវែងឆ្ងាយ។ វិធីមួយដែលងាយស្រួលក្នុងការទាក់ទាញអតិថិជនគោលដៅ 70% ទាំងនោះគឺផ្ដល់ឱកាសអោយពួកគាត់បានសាកល្បងនូវផលិតផលឬសេវាកម្មរបស់យើង។ ឧទាហរណ៍ បើអ្នកលក់ឡាន អ្នកគួរតែអនុញ្ញាតអោយគាត់បានឡើងកាន់ចង្កូតឡាននោះហើយបើកសាកល្បងជុំវិញទីក្រុងលេង ដោយអ្នកមិនចាំបាច់និយាយរៀបរាប់ពីលក្ខណៈបច្ចេកទេសរបស់ឡាន ឬប្រវត្តិរបស់វាឡើយព្រោះមនុស្សភាគច្រើនមិនសូវចាប់អារម្មណ៍ពីវាទេ គឺគេចាប់អារម្មណ៍ថាពេលបើកនិងពេលជិះតើផ្ដល់ផាសុកភាពប៉ុណ្ណា។

ប្រសិនគាត់ជាប្រភេទអតិថិជន 3% ហើយគួបផ្សំនឹងការចេះរាក់ទាក់យកចិត្តភ្ញៀវ និងពូកែខាងលក់ផង គាត់នឹងទិញឡាននោះភ្លាម។ ហើយប្រសិនបើគាត់ជាប្រភេទអតិថិជន 67% ផ្សេងទៀតទោះបីជាគាត់មិនទិញភ្លាមក៏គាត់ទទួលបានបទពិសោធន៍ពីការបើកឡានរបស់យើងដែរ ដូចនេះបើថ្ងៃក្រោយគាត់ត្រូវការឬមានមិត្តភក្កិបងប្អូនចង់ទិញឡាន គាត់ប្រហែលជានឹងណែនាំអោយមកកន្លែងរបស់យើងជាមិនខាន។ វិធិសាស្ត្រនេះក៏ត្រូវបានផ្សារទំនើបមួយចំនួនប្រើដែរដោយពួកគេមានអ្នកចាំផ្ដល់នំឬភេសជ្ជៈដល់អតិថិជនក្នុងផ្សារនោះ នៅពេលដែលអតិថិជនសាកល្បងហើយយល់ថាឆ្ងាញ់ គាត់ក៏នឹងទៅទិញវា។ អ្នកក៏អាចយកទៅប្រើសម្រាប់ការលក់ទំនិញឬសេវាកម្មផ្សេងៗដែរ សំខាន់គឺថាអ្នកចេះស្វែងរកនូវវិធីសាស្ត្រដែលអាចអោយអតិថិជនទទួលបានបទពិសោធន៍ពីការប្រើប្រាស់វាហើយស្គាល់ពីគុណភាពនិងសេវាកម្មរបស់យើងបាន៕

ផ្ទាំងឃោសនាពាណិជ្ជកម្ម
ខ្ញុំគឺជាជំនួយការសរសរអត្ថបទរបស់ apamat.com។ ខ្ញុំចូលចិត្តការងារនេះព្រោះខ្ញុំអាចសរសេរអត្ថបទទាក់ទងនឹង ការធ្វើជំនួញដើម្បីអ្នកអានគ្រប់គ្នា។ ខ្ញុំសង្ឃឹមថាអ្នកទាំងអស់គ្នានឹងក្លាយទៅជាអ្នកជំនួញជោគជ័យ ព្រោះនាពេល អនាគតបញ្ហារបស់ពិភពលោកភាគច្រើននឹងត្រូវបានដោះស្រាយដោយអ្នកជំនួញ។