Facebook បង្ហាញមុខប្រធានក្រុមហ៊ុនថ្មីរបស់ Instagram បន្ទាប់ពីសហស្ថាបនិកទាំងពីរបានលាលែង

1936
លោក Adam Mosseri

អាមេរិក(CNBC)៖ កាលពីថ្ងៃចន្ទម្សិលមិញ ក្រុមហ៊ុន Facebook បានប្រកាសថាលោក Adam Mosseri នឹងឡើងកាន់តំណែងជាប្រធានក្រុមហ៊ុន Instagram បន្ទាប់ពីមានការលាឈប់ពីសហស្ថាបនិកទាំងពីរនាក់របស់ Instagram គឺលោក Kevin Systrom និងលោក Mike Krieger កាលពីសប្តាហ៍មុន។

លោក Mosseri បានចូលធ្វើជាប្រធានផ្នែកផលិតផលរបស់ Instagram ចាប់តាំងពីដើម 2018 ហើយកាលពីមុននោះទៀតគាត់ធ្វើការជាអ្នកដឹកនាំផ្នែកព័ត៌មាន (New Feeds) របស់ក្រុមហ៊ុន Facebook។ អ្នកនាំពាក្យ Instagram បានប្រាប់ស្ថានីយទូរទស្សន៍ CNBC ថា Mosseri នឹងធ្វើជាអ្នកគ្រប់គ្រងនៅ Instagram ឆាប់ៗនេះ។

លោក Systrom និង Krieger បាននិយាយនៅក្នុងសេចក្តីថ្លែងការណ៍មួយថា “យើងមានក្តីរំភើបរីករាយក្នុងការប្រគល់តំណែងអ្នកគ្រប់គ្រងទៅឲ្យអតីតអ្នកដឹកនាំផលិតផលដែលមានប្រវត្តិដឹកនាំដ៏អស្ចារ្យ  និងជាមនុស្សម្នាក់ដែលមានភាពច្នៃប្រឌិតខ្ពស់ និងមានភាពសាមញ្ញ ហើយគាត់ជាមនុស្សដែលយល់ដឹងយ៉ាងជ្រាលជ្រៅអំពីសារៈសំខាន់នៃសហគមន៍” ។

លោក Systrom និងលោក Krieger បានប្រកាសលាលែងពីក្រុមហ៊ុនដែលអ្នកទាំងពីរបង្កើតឡើង កាលពីសប្តាហ៍មុន បន្ទាប់ពីអ្នកទាំងពីរបានលក់ Instagram ទៅឲ្យ Facebook នៅឆ្នាំ 2012 ក្នុងតម្លៃ 1 ពាន់លានដុល្លារ។ យោងតាមរបាយការណ៍ជាច្រើនដែលបានផ្សាយកាលពីសប្ដាហ៍មុនបានឱ្យដឹងថា ការចាកចេញរបស់ពួកគេបានកើតមានឡើងបន្ទាប់មានការរីកឡើងនៃការលូកដៃរបស់លោក Mark Zuckerberg នាយកប្រតិបត្តិក្រុមហ៊ុនហ្វេសប៊ុក ដោយសារលោក Mark បានព្យាយាមជ្រៀតជ្រែកក្នុងការកំណត់ទិសដៅអនាគតនៃកម្មវិធីចែករំលែករូបភាពដ៏ពេញនិយមមួយនេះ ខណៈនៅពេលដែល Facebook សុំទិញ Instagram កាលពីប្រាំមួយឆ្នាំមុន លោក Mark បានសន្យាថាឲ្យសហស្ថាបនិកទាំងពីររបស់ Instagram នៅបន្តដឹកនាំក្រុមហ៊ុនដោយឯករាជ្យដដែល ទោះបីខ្លួនបានទិញយកមកធ្វើជាកម្មសិទ្ធក៏ដោយ។ 

លោក Mosseri បានក្លាយជាក្រុមអ្នកបង្កើតបណ្តាញទំនាក់ទំនងសង្គមចាប់តាំងពីលោកបានចូលរួមជាអ្នករចនាម៉ូដផលិតផលនៅក្នុងឆ្នាំ 2008 ។ ក្នុងអំឡុងពេលធ្វើការជាមួយ Facebook លោក Mosseri ក៏បានបម្រើការជាប្រធានផ្នែករចនាកម្មវិធីទូរស័ព្ទរបស់ក្រុមហ៊ុន និងក្រោយមកទៀតបានផ្លាស់មកដឹកនាំផ្នែកព័ត៌មានវិញ មុនពេលទៅធ្វើជាប្រធានផ្នែកផលិតផលនៅ Instagram ហើយពេលនេះគាត់នឹងឡើងតំណែងជាប្រធានក្រុមហ៊ុន Instagram វិញម្តង។

លោក Mosseri បាននិយាយនៅក្នុងសេចក្តីថ្លែងការណ៍មួយថា “ខ្ញុំពិតជាមិននឹងស្មាន និងរំភើបចំពោះការមានឱកាសបានដឹកនាំក្រុមការងារនៅ Instagram” ។

គូសបញ្ចាក់ថា ភាគហ៊ុនរបស់ហ្វេសប៊ុកបានធ្លាក់ចុះជាង 1 ភាគរយកាលពីថ្ងៃចន្ទម្សិលមិញ៕

ផ្ទាំងឃោសនាពាណិជ្ជកម្ម
ខ្ញុំគឺជាអ្នកសរសេរអត្ថបទ និងអ្នកទីផ្សារឲ្យគេហទំព័រ apamat.com ហើយខ្ញុំក៏កំពុងធ្វើការជាអ្នកទីផ្សារឲ្យក្រុមហ៊ុនផ្សេងទៀតផងដែរ។ ខ្ញុំចូលចិត្តចែករំលែក ហើយខ្ញុំមកទីនេះគឺដោយសារខ្ញុំចង់ចែករំលែកអ្វីដែលខ្ញុំដឹងអំពីការធ្វើជំនួញ ជាមួយអ្នក។