កំហុស ៦ ដែលអាជីវកម្មខ្នាតតូចបង្កើតឡើង ធ្វើឲ្យអតិថិជនស្អប់មិនចង់មកទិញទៀត

រាល់គ្រប់អាជីវកម្មតែងតែបង្កើតកំហុស គ្រាន់តែតិច ឬច្រើន ប៉ុន្តែអាជីវកម្មដែលជោគជ័យ គឺជាអាជីវកម្មដែលបង្កើតកំហុសតិចបំផុត។ ពួកគេបង្កើតកំហុសតិច ដោយសារតែពួកគេដឹងថាអតិថិជនចូលចិត្តអ្វី ហើយមិនចូលចិត្តអ្វី។ វាហាក់ដូចជាចំណុចតូចៗទេ ប៉ុន្តែវាមានឥទ្ធិពលខ្លាំងដល់អាជីវកម្មរបស់អ្នក ជាពិសេសបើអ្នកមានគូប្រជែងច្រើន។ ខាងក្រោមនេះ apamat.com នឹងចែករំលែកកំហុសមួយចំនួនដែលអ្នកមិនគួរឲ្យកើតមានឡើង បើសិនអ្នកមិនចង់បាត់អតិថិជន។

១. ផ្តល់ព័ត៌មានខុស

មិនថាអ្នកប្រកបអាជីវកម្មអ្វីនោះទេ អតិថិជនត្រូវការទំនាក់ទំនងទៅអ្នកដើម្បីសួរនាំអំពីផលិតផល ឬសេវាកម្មរបស់អ្នកមុនពេលពួកគាត់សម្រេចចិត្តទិញ។ ប្រសិនបើអ្នក ឬបុគ្គលិកផ្តល់សេវាកម្មអតិថិជនរបស់អ្នកផ្តល់ព័ត៌មានខុស វាអាចបំផ្លាញកេរិ៍ឈ្មោះអាជីវកម្មរបស់អ្នកក្នុងរយៈពេលវែង។

២. ពិបាកទាក់ទង

អាជីវកម្មមួយចំនួនមានលេខទូរស័ព្ទឲ្យទាក់ទង ប៉ុន្តែនៅពេលអតិថិជនខលទៅមិនលើក។  នៅពេលអតិថិជនខលទៅ មានន័យថាពួកគាត់មានរឿងសំខាន់ចង់និយាយដូចជាសួរនាំពីបន្ថែមពីផលិតផលដែលគាត់បានទិញទៅ ផលិតផលរបស់អ្នកមានបញ្ហា ឬគាត់ចង់បញ្ជាទិញផលិតផលរបស់អ្នកបន្ថែម។ មិនថាអ្នក ឬអ្នកផ្សេងឡើយ នៅពេលខលទៅមិនលើក ហើយប្រញាប់ទៀតនោះ បើមានជម្រើសអ្នកមិនទៅទិញពីក្រុមហ៊ុននោះទៀតឡើយ។

៣. មិនស្តាប់អតិថិជន

ការដែលប្រឹងនិយាយសរសើរខ្លួនឯង តែមិនព្រមស្តាប់អតិថិជន ធ្វើឲ្យអតិថិជនមានអារម្មណ៍ថាមិនទទួលបានការយកចិត្តទុកដាក់ ហើយពួកគាត់នឹងគ្មានអារម្មណ៍ឯណាមកទិញអ្នកទៀតឡើយ។ អ្នកគួរស្តាប់ដោយយកចិត្តទុកដាក់សិនថាអតិថិជនគាត់ចង់បានអ្វី ទើបអ្នកនិយាយជាមួយគាត់ ត្រូវតាមចិត្តរបស់គាត់ ធ្វើឲ្យគាត់ទិញ។

៤. ប្រើពាក្យឈ្លើយ

គ្មានអ្វីអាក្រក់ជាងការប្រើពាក្យមិនសមរម្យជាមួយអតិថិជននោះទេ។ នៅហាងខ្លះ នៅពេលអតិថិជនស្លៀកពាក់មិនស៉ីវិល័យ សួរនាំមិនចង់ឆ្លើយ ទឹកមុខមើលមិនយល់ មើលលើមើលក្រោមដាក់អតិថិជនជាដើម។ អតិថិជនខ្លះចូលចិត្តស្លៀកពាក់បែបសាមញ្ញៗ មិនមានន័យថាគាត់គ្មានលុយទិញទំនិញនៅហាងនោះទេ ហើយពេលខ្លះពួកគេជាគូប្រជែងរបស់អ្នកដែលបន្លំខ្លួនមកស៉ើបពីចំណុចខ្សោយរបស់អ្នកប៉ុណ្ណោះ។

៥. គិតថ្លៃដឹកជញ្ជូនថ្លៃពេក

ការគិតថ្លៃដឹកជញ្ជូនពីអតិថិជនថ្លៃពេក វាធ្វើឲ្យអតិថិជនគិតថាអ្នកគិតតែចង់ចំណេញពីពួកគាត់។ បើជ្រុសតែអ្នកគិតថ្លៃដឹកជញ្ជូន អ្នកគួរបូកថ្លៃដឹកក្នុងតម្លៃលក់ផលិតផលឲ្យរួចទៅ ហើយប្រាប់ពួកគាត់ថា Free ដឹកជញ្ជូន។ ឧទាហរណ៍ថាផលិតផលអ្នកមាន តម្លៃ ៣០ដុល្លារ ហើយអ្នកគិតថ្លៃដឹក ២ដុល្លារពីអតិថិជន ជំនួសឲ្យការធ្វើបែបនេះ អ្នកគួរប្រាប់អតិថិជនថាផលិតផលរបស់អ្នកមានតម្លៃ ៣២ដុល្លារ ហើយដឹកជញ្ជូនដោយមិនគិតថ្លៃ។ រឿងគឺដូចគ្នាទេ តែអ្វីដែលចំណេញគឺធ្វើឲ្យអតិថិជនមានអារម្មណ៍ល្អ និងចាប់អារម្មណ៍លើអាជីវកម្មរបស់អ្នក ដោយសារពាក្យដឹកជញ្ជូនឥតគិតថ្លៃ។

៦. ប្រាប់អតិថិជនឲ្យរង់ចាំយូរពេក

នៅពេលខ្លះ អតិថិជនទាក់ទងមកអ្នកសួរនាំ ឬបញ្ជាទិញទំនិញអ្វីមួយ ប៉ុន្តែគាប់ជួនអ្នករវល់ធ្វើកិច្ចការអ្វីមួយ ហើយក៏ប្រាប់អតិថិជនថា “ចាំខ្ញុំទាក់ទងទៅអ្នកវិញនៅពេលក្រោយ” ប៉ុន្តែអ្នកបែរជាមិនទាក់ទងទៅគាត់វិញដែលខំរង់ចាំអ្នក។ វាធ្វើឲ្យពួកគាត់មានអារម្មណ៍ថាត្រូវបានគេកុហក ហើយបើគាត់មានជម្រើស គាត់នឹងទៅរកអ្នកផ្សេង៕

ផ្ទាំងឃោសនាពាណិជ្ជកម្ម