មេរៀនចំនួន ៧ ដែលសហគ្រិនវ័យក្មេងកម្ពុជាអាចរៀនសូត្រពីលោក Mark Zuckerberg

3783

នាយកប្រតិបត្តិ និងសហស្ថាបនិកនៃក្រុមហ៊ុន Facebook លោក Mark Zuckerberg បានសម្រេចក្តីស្រមៃរបស់ខ្លួន ដែលជាក្តីស្រមៃមួយដែលមានមនុស្សតែប៉ុន្មាននាក់ប៉ុណ្ណោះអាចធ្វើដូចលោកបាននៅលើផែនដីនេះ។ កាលពីគាត់មានអាយុ ១៩ឆ្នាំ គាត់បានបង្កើតគេហទំព័រមួយគឺthefacebook.comនៅក្នុងបន្ទប់ស្នាក់នៅសម្រាប់សិស្សមួយនាសាកលវិទ្យាល័យ Harvard ថ្ងៃនេះគាត់មានអាយុ ៣៤ឆ្នាំ ជាប់ឈ្មោះជាកំពូលមហាសេដ្ឋីលើលោកលេខ ៨ មានទ្រព្យសម្បត្តិសរុប ៦៧.៥ ពាន់លានដុល្លារអាមេរិក។

សហគ្រិនវ័យក្មេងកម្ពុជា អាចរៀនពីអតីតមហាសេដ្ឋីវ័យក្មេងបំផុតរបស់ពិភពលោក Mark Zuckerberg ដែលរកលុយបានដោយខ្លួនឯងពីអាជីវកម្មរបស់ខ្លួន ហើយខាងក្រោមនេះគឺជាមេរៀនខ្លះៗដែលយើងអាចរៀនបានពីបុរសអច្ឆៈរយៈម្នាក់នេះ។

១. មានចំណង់ងុបងល់នឹងអ្វីដែលខ្លួនធ្វើ

នៅពេលដែលអ្នកស្រាវជ្រាវអំពីជីវិតរស់នៅរបស់កំពូលអ្នកជំនួញលំដាប់ពិភពលោក អ្នកនឹងចាប់អារម្មណ៍ថាពួកគេមានចំណង់ងុបងល់នឹងអ្វីដែលពួកគេធ្វើ។ ដូចជាម្ចាស់របស់ Facebook ជាដើម គាត់មានមហិច្ចតាធ្វើឲ្យពិភពលោកទំនាក់ទំនងគ្នាបានកាន់តែងាយស្រួលតាមរយៈ Facebook ហើយជារៀងរាល់ថ្ងៃគាត់តែងតែខិតខំសម្រេចមហិច្ចតារបស់គាត់ដោយពោរពេញដោយភាពរីករាយ និងថាមពល។ លោក Donald Trump ធ្លាប់និយាយថាបើគ្មានចំណង់ អ្នកនឹងគ្មានកម្លាំងធ្វើ ហើយបើគ្មានកម្លាំង អ្នកនឹងមិនអាចសម្រេចអ្វីបានឡើយ 

២.កំណត់គោលដៅឲ្យខ្ពស់ និងវែងឆ្ងាយ

លោក Mark Zuckerberg គោរពគោលការណ៍មួយគឺគិតឲ្យធំ ចាប់ផ្តើមពីតូច ចាប់តាំងពីចាប់ផ្តើមយ៉ាងស្ងៀមស្ងាត់ រហូតដល់ល្បីពេញពិភពលោក លោក Zuckerberg តែងតែកំណត់គោលដៅខ្ពស់ និងវែងឆ្ងាយ។ ទម្រាំគាត់ឆ្លងមកដល់ដំណាក់កាលនេះ គាត់បានបដិសេធគំនិតអវិជ្ជមាន និងកំសាកញីជាច្រើន ដើម្បីបង្កើតភាពជោគជ័យសម្រាប់ខ្លួនលោក និងក្រុមហ៊ុន Facebook ។ មួយវិញទៀត បើលោកមិនមានគោលដៅវែងឆ្ងាយទេ ម្លេះគាត់លក់ក្រុមហ៊ុនចោលតាំងពីពេលចាប់ផ្តើមដំបូង នៅពេលក្រុមហ៊ុនធំៗសុំទិញយកបាត់ទៅហើយ។

៣.កុំធ្វើទាំងមិនទាន់បានត្រៀមខ្លួនរួចរាល់

សហគ្រិនវ័យក្មេង ភាគច្រើនចិត្តក្តៅ នឹកឃើញអ្វីធ្វើភ្លាម ហើយក៏នាំឲ្យពួកគេបរាជ័យភ្លាមៗដែរ។ នេះគឺជាធម្មជាតិរបស់មនុស្ស នៅក្មេង ចាស់ៗតែងនិយាយថាឈាមរាវ ប៉ុន្តែលោក Zuckerberg ត្បិតតែគាត់ចាប់ផ្តើមទាំងវ័យក្មេង តែគាត់មានភាពចាស់ទុំក្នុងការធ្វើជំនួញ។ សហគ្រិនគួររើសយកទីផ្សារដោយប្រុងប្រយ័ត្ន កុំចេះតែឃើញគេបាន ធ្វើតាមគេ។ មានពាក្យមួយឃ្លារបស់ Zuckerberg គឺកំហុសធំបំផុតនោះគឺ ការមិនហ៊ានប្រថុយ ត្រង់ឃ្លានេះមិនមែនមានន័យថា ប្រថុយទាំងងងឹតងងល់នោះទេ ប៉ុន្តែគុណគូបូកដកពីកម្រិតហានិភ័យរួចហើយ ទើបហ៊ានវិនិយោគ។

៤.រើសមនុស្សឲ្យបានត្រូវ

និយាយតាមត្រង់ទៅនៅកម្ពុជាបច្ចុប្បន្ន ពិបាករើសមនុស្សឲ្យបានត្រូវណាស់បើនិយាយពីការចាប់ផ្តើមអាជីវកម្ម ជាពិសេសសម្រាប់សហគ្រិនវ័យក្មេងហ្នឹងតែម្តង។ ព្រោះថាវិស័យ startups នៅកម្ពុជានៅមានកម្រិត ហើយការអប់រំនៅសាលាក៏មិនសូវមានប្រសិទ្ធភាព ដែលនាំឲ្យពិបាករើសដៃគូដែលពូកែសាកសម្យនឹងគ្នា ម្លោះហើយក្រុមសហគ្រិនវ័យក្មេងមួយចំនួនហេតុតែត្រូវការហើយ មិនមានពេលរើសច្រើននោះទេ។ 

បើនិយាយពីលោក Zuckerberg វិញ គាត់មិនដែលរុញរាក្នុងការបណ្តេញបុគ្គលិកណាម្នាក់របស់គាត់ចេញនោះទេ ដូចដែលអ្នកបានដឹងហើយ សូម្បីតែស្ថាបនិករបស់ Instagram ក៏ត្រូវបានបង្ខំចិត្តលាឈប់ដែរ ហើយមិនមែនមានតែពួកគេទាំងពីរទេ នៅមានស្ថាបនិករបស់ WhatsApp ស្ថានិករបស់ Oculus ដែលសុទ្ធសឹងតែជាអ្នកបង្កើតកម្មវិធីល្បីៗ ហើយលក់ទៅឲ្យ Facebook ក៏ត្រូវលាឈប់ផងដែរដោយសារមិនចុះសម្រុងជាមួយលោក Zuckerberg  

លោក Zuckerberg ធ្លាប់ទូន្មានវិធីរើសបុគ្គលិកឲ្យបានល្អថា រើសបុគ្គលិកណាដែលអាចបំពេញកង្វះខាតរបស់អ្នកបាន។ អ្នកស្រី Sheryle Sandberg អតីតបុគ្គលិករបស់ Google គឺជាឧទាហរណ៍។ លោក Zuckerberg បានជួលអ្នកស្រី Sandberg មកធ្វើការក្នុងតំណែង COO នៅ Facebook (ប្រធានផ្នែកប្រតិបត្តិការ ធ្វើការក្រោមបញ្ជា CEO) កាលដើមឡើយ Facebook រកចំណូលបានតែពីការលក់ទិន្នន័យប៉ុណ្ណោះ ប៉ុន្តែអ្នកស្រី Sandberg គឺជាអ្នកនៅពីក្រោយសេវាផ្សាយពាណិជ្ជកម្មដូចរាល់ថ្ងៃនេះ ហើយបានធ្វើឲ្យ Facebook រកចំណូលបានច្រើនជាងពីពេលមុនរាប់សិបដងឯនោះ។

៥.ផ្តោតលើផលិតផលរបស់អ្នក ហើយធ្វើឲ្យវាកាន់តែល្អ

យោងតាមលោក Zuckerberg គាត់បាននិយាយថា អ្នកមិនគួររំពឹងថាបានលទ្ធផលជោគជ័យ ដោយគ្មានការផលិតផលិតផលឲ្យបានល្អជាងគេនោះទេ។ ទោះបីជាលោក Zuckerberg កាន់តួរនាទីជា CEO ក៏ដោយ ក៏គាត់នៅតែធ្វើការយ៉ាងស្និតជាមួយក្រុមអ្នកអភិវឌ្ឍន៍កម្មវិធី Facebook ដែរ។ ក្នុងនាមជាសហគ្រិនក្មេងខ្ចី អ្នកគួរផ្តោតលើតើអតិថិជនត្រូវការអ្វី ហើយបន្ទាប់មកធ្វើឲ្យផលិតផលនោះត្រូវតាមអ្វីដែលអតិថិជនចង់បាន។

៦.ពេលវេលា ជាមាសប្រាក់

អត្តចរិតមួយទៀតរបស់លោក Zuckerberg គឺគាត់ផ្តល់តម្លៃខ្លាំងលើពេលវេលាជាងអ្វីៗផ្សេងទៀត។ សម្រាប់គាត់ អាយុគឺគ្រាន់តែជាតួលេខប៉ុណ្ណោះ។ គាត់ចង់បង្កើតសមិទ្ធផលឲ្យកាន់តែធំក្នុងជីវិតរបស់គាត់ ហើយនេះគឺជាមូលហេតុដែលគាត់ផ្តល់តម្លៃលើពេលវេលាខ្លាំង។ គាត់យល់ថា នៅពេលអាយុជីវិតបាត់បង់ គាត់មិនអាចយកវាមកវិញបានទេ ទោះបីជាគាត់ចំណាយលុយប៉ុន្មានពាន់លានដុល្លារក៏ដោយ។ 

៧.បន្តការរៀន

ទោះបីជាលោក Zuckerberg ត្រូវបានមនុស្សទូទៅហៅគាត់ថាជាមនុស្សបច្ចេកវិទ្យាក៏ដោយ ប៉ុន្តែគាត់នៅតែរៀនអំពីបច្ចេកវិទ្យាថ្មីៗដែលទើបត្រូវបានគេបង្កើតឡើង។ ក្រៅពីនោះ គ្រប់ពេលទំនេរ គាត់តែងតែចំណាយពេលអានសៀវភៅ ជាងយកពេលទៅធ្វើរឿងឥតប្រយោជន៍៕

ផ្ទាំងឃោសនាពាណិជ្ជកម្ម
ខ្ញុំគឺជាអ្នកសរសេរអត្ថបទ និងអ្នកទីផ្សារឲ្យគេហទំព័រ apamat.com ហើយខ្ញុំក៏កំពុងធ្វើការជាអ្នកទីផ្សារឲ្យក្រុមហ៊ុនផ្សេងទៀតផងដែរ។ ខ្ញុំចូលចិត្តចែករំលែក ហើយខ្ញុំមកទីនេះគឺដោយសារខ្ញុំចង់ចែករំលែកអ្វីដែលខ្ញុំដឹងអំពីការធ្វើជំនួញ ជាមួយអ្នក។