តិចនិកលាយចិត្តសាស្ត្រ ៨ ដើម្បីផ្តល់សេវាកម្មជូនអតិថិជនឲ្យបានកាន់តែល្អ

4204

សេវាកម្មអតិថិជនល្អ អាចទាក់យកបេះដូងរបស់អ្នកទិញបានមួយជីវិត មិនតែប៉ុណ្ណោះពួកគាត់អាចណែនាំអំពីហាង ឬក្រុមហ៊ុនរបស់អ្នកទៅដល់មិត្តភក្តិ និងក្រុមគ្រួសាររបស់ពួកគាត់ទៀតផង។ សេវាកម្មអតិថិជនដ៏ល្អ គឺជាសេវាកម្មមួយដែលផ្តល់ជូនអតិថិជនយ៉ាងអស់ពីចិត្ត ដែលអារម្មណ៍នោះអាចធ្វើឲ្យអតិថិជនមានអារម្មណ៍កក់ក្តៅ ដូច្នេះទើប apamat.com តែងតែនិយាយថា “អតិថិជនទិញដោយប្រើអារម្មណ៍”។ អ្នកប្រហែលជាមានវិធីល្អៗដែលអ្នកដឹង ប៉ុន្តែខាងក្រោមនេះគឺជាវិធីចំនួន ៨ ដែលខ្ញុំចង់ចែករំលែកដល់អ្នក ហើយខ្ញុំជឿថាអ្នកអាចផ្តល់សេវាកម្មជូនអតិថិជនរបស់អ្នក បានល្អជាងខ្ញុំទៅទៀត។

១. ស្គាល់ផលិតផល ឬសេវាកម្មរបស់អ្នកច្បាស់

ដើម្បីផ្តល់សេវាកម្មអតិថិជនល្អមួយ អ្នកត្រូវស្គាល់ផលិតផល ឬសេវាកម្មដែលអ្នកកំពុងលក់ ដើម្បីឲ្យអ្នកអាចពន្យល់អតិថិជនឲ្យស្គាល់ផលិតផលរបស់អ្នកច្បាស់ដែរ ដូចជាមុខងារ គុណភាព និងប្រសិទ្ធភាពរបស់ផលិតផលនោះជាដើម។ អ្នកត្រូវចាប់អារម្មណ៍នូវសំណួរដែលអតិថិជនចូលចិត្តសួរ ហើយត្រូវរៀបចម្លើយយ៉ាងណាឲ្យពួកគាត់ពេញចិត្ត។

២. ធ្វើអារម្មណ៍ឲ្យរួសរាយ

ក្នុងនាមជាអ្នកលក់ ការងារដែលត្រូវធ្វើគឺលក់ទំនិញ ឬសេវាកម្មឲ្យដាច់ ដូច្នេះកុំយកអារម្មណ៍មួរម៉ៅផ្ទាល់ខ្លួនពីខាងក្រៅមកលាយឡំជាមួយការងារលក់។ នៅពេលដែលអ្នកលក់ទំនិញឲ្យអតិថិជនដោយផ្ទាល់ (លក់នៅក្នុងហាង ហើយការលក់មិននៅហាង គឺលក់តាមអនឡាញ) អ្នកត្រូវសំដែងការគោរព ឲ្យតម្លៃ និងសំដែងកាយវិការយកចិត្តទុកដាក់ចំពោះអតិថិជន។ ចំពោះការផ្តល់សេវាកម្មអតិថិជនតាមរយៈអនឡាញ រូបស្ទីកឃ័រញញឹម ឬសើច ក៏អាចបង្ហាញអារម្មណ៍រួសរាយរបស់អ្នកទៅកាន់អតិថិជនបានដែរ ហើយបើតាមរយៈការនិយាយទូរស័ព្ទគឺគ្រាន់តែសំលេងសើចគឺគ្រប់គ្រាន់ហើយ។

៣. និយាយពាក្យ “អរគុណ”

ពាក្យអរគុណមានន័យជ្រាលជ្រៅជាងអ្វីដែលគ្រប់គ្នាគិត វាអាចធ្វើឲ្យអតិថិជនចងចាំពាក្យដែលអ្នកនិយាយអរគុណដូចជាអនុស្សាវរីយ៍មួយដូច្នោះដែរ។ ចូរនិយាយពាក្យថា “អរគុណ” ដល់អតិថិជនរបស់អ្នករហូតទាល់តែវាក្លាយជាទម្លាប់ដូចអ្នកតែងតែញាំបាយរាល់ថ្ងៃ។ នៅហាងលក់រាយ ឬសាខាក្រុមហ៊ុនខ្លះ គេតែងជួលបុគ្គលិកស្រីដែលមានសម្រស់ស្រស់ស្អាតឲ្យធ្វើជាបុគ្គលិកគិតលុយ និងបម្រើសេវាកម្មអតិថិជន ដែលវិធីនេះធ្វើឲ្យពាក្យអរគុណកាន់តែមានឥទ្ធិពលលើអតិថិជន។

៤. បង្វឹកបុគ្គលិករបស់អ្នក

វាគឺជារឿងសំខាន់ដែលបុគ្គលិករបស់អ្នក ត្រូវតែចេះផ្តល់សេវាកម្មអតិថិជនដ៏ល្អដូចដែលអ្នកធ្លាប់ធ្វើដែរ។ អ្នកត្រូវបង្រៀនពួកគេពីរបៀបនិយាយ បង្ហាញកាយវិការ ទឹកមុខ និងរបៀបឆ្លើយតបនៅពេលអតិថិជនជួបបញ្ហា។ បុគ្គលិកនៅកន្លែងខ្លះ ពួកគេមិនបានដាក់អារម្មណ៍បម្រើសេវាកម្មជូនអតិថិជនទេ ព្រោះយល់ថាវាមិនមែនជាអាជីវកម្មរបស់ពួកគេ ប៉ុន្តែតាមពិតវាគឺជាការងាររបស់ពួកគេ។ អ្នកគួរបង្វឹកបុគ្គលិករបស់អ្នកឲ្យពួកគេបម្រើសេវាកម្មជូនអតិថិជនឲ្យដូចជាកំពុងបម្រើសេវាកម្មឲ្យអាជីវកម្មរបស់ពួកគេដែរ។

៥. បង្ហាញការគោរព

សេវាកម្មអតិថិជនជាប់ទាក់ទងនិងការរំភើបចិត្ត ដូច្នេះការបង្ហាញពីការគោរពដល់អតិថិជន អាចធ្វើឲ្យអតិថិជនដើរចេញពីហាងរបស់អ្នកដោយអារម្មណ៍រីករាយ និងរំភើប។ ប្រសិនបើអ្នកចូលទៅញាំអីនៅភោជនីយដ្ឋានរបស់ជនជាតិចិន ភាគច្រើនអ្នកនិងឃើញមានបុគ្គលិកឈអមទ្វាចូលដើម្បីបង្ហាញការស្វាគមន៍ដោយការគោរព។ វាគឺជាតិចនិកចិត្តសាស្ត្រមួយ នៅពេលអ្នកធ្វើឲ្យអតិថិជនមានអារម្មណ៍ថាពួកគេទទួលបានតម្លៃ ឬត្រូវបានគេលើកតម្កើង ពួកគេនឹងទទួលបានបទពិសោធន៍មួយដ៏អស្ចារ្យ ហើយនៅពេលពួកគេចូលទៅហាងផ្សេងដែលផ្តល់សេវាកម្មអន់ជាងហាងរបស់អ្នក ពួកគេនឹងនឹកឃើញដល់យីហោហាងរបស់អ្នក។

៦. ស្តាប់ឲ្យច្រើន

ការលក់មិនមែនមានន័យថាត្រូវនិយាយឲ្យច្រើននោះទេ។ ការស្តាប់គឺជាល្បិចសម្ងាត់មួយក្នុងការផ្តល់សេវាកម្មអតិថិជន។ ស្តាប់អតិថិជននិយាយមកកាន់អ្នកដោយយកចិត្តទុកដាក់ ហើយអំឡុងពេលកំពុងស្តាប់នោះ អ្នកត្រូវគិតរកអ្វីដែលពួកគាត់កំពុងត្រូវការ ហើយនៅពេលពួកគាត់និយាយចប់ អ្នកប្រាកដជាដឹងថាគួរធ្វើបែបណាដើម្បីបំពេញតម្រូវការដែលអតិថិជនចង់បាន។ ជាធម្មជាតិ នៅពេលនរណាម្នាក់យល់ពីអ្វីដែលអ្នកចង់បាន អ្នកនឹងមានអារម្មណ៍ថាងាយស្រួល។ នៅពេលអ្នកធ្វើជាអ្នកលក់ អ្នកអាចលក់បានលឿន ឬឆាប់ គឺអាស្រ័យលើល្បឿនដែលអ្នកអាចចាប់បានពីអ្វីដែលអតិថិជនចង់បាន។ រឿងខ្លះអតិថិជនមិននិយាយចំៗទេ ហើយពួកគេក៏មិនចង់និយាយច្រើនដែរ ដូចនេះអ្នកគួរចេះអានចិត្តរបស់ពួកគេថាតើពួកគេចង់បានអ្វីទោះបីជាពួកគេមិននិយាយក៏ដោយ។

៧. មានទំនួលខុសត្រូវ

មានអាជីវកម្មជាច្រើនដែលតែងតែផ្សាយថាពួកគេមានដំណោះស្រាយល្អនៅពេលអតិថិជនជួបបញ្ហាជាមួយផលិតផល ឬសេវាកម្មរបស់ពួកគេ ប៉ុន្តែជាក់ស្តែងវាគ្រាន់តែការសន្យាខ្យល់មួយប៉ុណ្ណោះ។ ប៉ុន្តែបើអ្នកមិនមែនគ្រាន់តែចង់ចំណេញមួយឆាវ ហើយចង់ឲ្យអាជីវកម្មរបស់អ្នកលូតលាស់បានយូអង្វែង អ្នកត្រូវបំពេញសេវាកម្មជូនអតិថិជនឲ្យបានល្អតាមរយៈការមានទំនួលខុសត្រូវលើផលិតផល ឬសេវាកម្មដែលអ្នកលក់ជូនអតិថិជន។ នៅពេលអតិថិជនទិញផលិតផលពីហាងរបស់អ្នករួច ហើយពួកគេមានបញ្ហាមិនយល់ពីអ្វីមួយទាក់ទងនឹងផលិតផលនោះ អ្នកគួរដោះស្រាយចម្ងល់នោះដោយសេចក្តីពេញចិត្ត។ នៅកម្ពុជាមានក្រុមហ៊ុនជាច្រើនដែលគ្មានទំនួលខុសត្រូវខ្ពស់ដូចជាក្នុងវិស័យធានារ៉ាប់រង វិស័យធនាគារ និងវិស័យដឹកជញ្ជូនជាដើម

៨. សុំការផ្តល់មតិ ឬយោបល់ស្ថាបនា រួចហើយប្រើមតិនោះ

អ្នកនឹងមានអារម្មណ៍ភ្ញាក់ផ្អើលនៅពេលដែលអតិថិជនប្រាប់អ្នកអំពីប្រតិបត្តិការអាជីវកម្មរបស់អ្នក។ ពួកគាត់ខ្លះ អាចនិយាយសរសើរ តែក៏មានខ្លះនិយាយថាអាក្រក់ផងដែរ ប៉ុន្តែអ្នកត្រូវរកដំណោះស្រាយដែលធ្វើឲ្យអតិថិជនមានអារម្មណ៍មិនល្អ រួចហើយកែលម្អវា និងរក្សាអ្វីដែលល្អឲ្យកាន់តែល្អថែមទៀត៕

ផ្ទាំងឃោសនាពាណិជ្ជកម្ម
ខ្ញុំគឺជាអ្នកវិភាគទីផ្សាររបស់ APAMAT TEAM ហើយខ្ញុំមានមោទនភាពដែលបានមកទីនេះដើម្បីចែករំលែកអំពីស្ថានភាពទីផ្សារនៅកម្ពុជាដល់អ្នកដែលត្រូវការដឹងពីវា នៅពេលខ្ញុំទំនេរពីកិច្ចការនៅ APAMAT TEAM។